विभिन्न उद्योग,कम्पनीहरुले हदबन्दीभन्दा बढी जग्गा राखेको पाइएको छ । भूमि व्यवस्था सहकारी संघीय मामिला तथा सामान्य प्रशासन मन्त्रालयका अनुसार,यसरी हदबन्दी भन्दा जग्गा राख्नेमा विभिन्न सिमेन्ट उद्योग,हाइड्रोपावर,चिया कम्पनी,हाउजिङ कम्पनीहरु रहेका छन् ।
कर्मचारी प्रेसलाई प्राप्त विवरण अनुसार, सिमेन्ट उद्योगतर्फमात्र होङ्गसी शिवम्,युनाइटेड सिमेन्ट उद्योग,सगरमाथा सिमेन्ट,घोराही सिमेन्ट उद्योग, सोनापुर सिमेन्ट उद्योग,रोल्पा सिमेन्ट उद्योग र ह्वासिन सिमेन्ट नारायणले धादिङ गरी सात वटा सिमेन्ट उद्योगले हदबन्दी भन्दा बढी प्रयोग गरिरहेको पाइएको छ ।
प्राप्त विवरणका आधारमा होङ्गसी शिवम् सिमेन्टले ८ लाख ५३ हजार वर्गमिटर र मारुती सिमेन्टले २ लाख ३१ हजार वर्गमिटरभन्दा बढी जग्गा उपभोग गरिरहेका छन् । यस्तै युनाइटेड सिमेन्ट उद्योगले १ लाख ३८ हजार २ सय ४६ बर्गमिटर जग्गा उपभोग गरिरहेको भूमि व्यवस्था मन्त्रालयले विवरण दिएको छ । सगरमाथा सिमेन्ट उद्योगले २ हजार ११६ बर्गमिटरभन्दा बढी जग्गा लिएको देखिन्छ भने घोराही सिमेन्टले ३ लाख ५७ हजार ४४९ बर्गमिटर,सोनापुर सिमेन्टले १२ हजार ४ सय बर्ग मिटर जग्गा हदबन्दी भन्दा बढी राखेको पाइएको छ । प्राप्त विवरण अनुसार,रोल्पा सिमेन्टले ३६७० बर्गमिटर जग्गा हदबन्दी भन्दा बढी राखेको पाइन्छ । यस्का अलवा ह्वासिन सिमेन्ट नारायणले धादिङमा १८ हजार ५४९ बर्गमिटर र १ लाख ५७ हजार ४४ वर्गमिटर गरी कूल १ लाख ७७ हजार बर्गमिटर जग्गा हदबन्दी भन्दा बढी प्रयोग गरिरहेको पाइएको छ ।

बिज्ञापन

यता,बाँकेको गिजरा खाडखारी मिलले १२ लाख १९ हजार वर्गमिटर, रियालन्स सुगर मिल्सले ५ हजार ५ सय ५३ बर्गामिटर जग्गा हदबन्दी भन्दा बढी राखेको पाइएको छ । भूमिसम्बन्धी ऐन, २०२१ ले तराईमा १ बिघा तथा काठमाडौं उपत्यका र पहाडमा घरबारीका लागि अतिरिक्त ५/५ रोपनीको सहुलियत तोकेको छ भने तराई तथा भित्री मधेशमा १० बिघा र पहाडी क्षेत्रमा ७० रोपनीको स्पष्ट हदबन्दी तोकिएको छ । तर, कानूनलाई धज्जी उडाउँदै राजनीतिक प्रभाव र दबाबमा हाउजिङ, रियल स्टेट कम्पनीदेखि विभिन्न उद्योगहरुलाई असीमित जग्गा खरिदको स्वीकृति दिएको पाइएको हो । मन्त्रालयको अनुसार, देशभर १०४ वटा कम्पनी तथा संस्थाहरूले १ करोड ९२ लाख ४० हजार ३ सय २६ दशमलव ७२ वर्गमिटर जग्गा राख्न पाउने गरी हदबन्दी छुट पाएका छन् ।